الجوازات شكر وعتاب

صباح مزعج مش لانه حار لا احنا تعودنا على جونا خلاص

لكن اليوم اللي يكون عندي فيه مشوار إلى مراجعة جهة حكومية يكون مزعج وأفكر فيه طول الليل
حاولت ابحث في شبكة الإنترنت عن استمارات الخاصة بادارة الجوازات تجديد إقامة وغيرها ما حصلت شئ ,, جاني النعاس .
انتظرت إلى الساعة تسعة صباحاً وصليت ركعتين ودعيت الله التسهيل لي
وصلت لمقر إدارة الجوازات بعد عشر دقائق بعد التاسعة
ومن كثررررررررررررررررة الزحمة وبكل صعوبة حصلت موقف للسيارة في موقف هن قرشك ولا تهن نفسك
المهم ,, وقفنا عند اقرب واحد من اصحاب الاقلام الزرقاء عبينا الاستمارة وانطلقت إلى الباب الخاص بالجوازات القريب مني
وأحنا ماشين عليه بيحكيلي السائق ,, فيه عسكري على الباب يمنع دخول الناس
وصلت عنده بكل أدب ,, سلام عليكم صباح الخير ,, رد علي العسكري روح الباب الثاني
قلتله كل عام وانت بخير ,, انا كفيف من ذوي الاحتياجات الخاصة
العسكري ،، يكلم سائقي ،، خذه الباب الثاني ,, وما كلمني انا كأني مش موجود
قلت ،، بكل هدوء ،، فيه مرسوم ملكي واعطيته بطاقة الاعاقة وما خلصت كلامي ,, للمرة الثانية يكلم سائقي دخله من هنا بس بسرعة .
الحمد لله مشي الحال متوقع كذا .
في الطريق بداخل الجوازات فجأة ,, بيقولي السائق ارفع رجلك ,, رفعتها القدر المطلوب لأكبر درجه وحدة في العالم ،، شوي كنت بأرتمي على الارض
بدون مبالغة ,, اعتقد طول العتبه هي وحدة بس عند الباب أمكن 50سم .
وصلنا الصالة فوق بالسلامة .
كانت زحححححححححححححححمه مررررررررررررة .
ما في مكان علشان تنتظر أو حتى بس تمشي برجولك ,, أصلاً الناس مرصوصين على الكراسي وزيهم واقفين لغاية الجدار الخلفي للصالة .
زاحمنا زي غيرنا ,, شوي بيقولي سائقي ارفع رجلك ,, تذكرت الدرجه العملاقة ورفعت رجلي وانا مستعجب !!! ليش ويش فيه ,, قلي راح نطلع على الكراسي في الصف الأخير ,, لانه ما فيه مكان نمشي على الأرض !!!!!!!!!!!!! وصلنا للعسكري المنظم للسرا ,, قلتله عادي اكلمك وانا فوق على الكرسي ولا كيف نظامكم تراني جديد في شغلة الكراسي ,, قلي خليك على الكراسي أمكن أوراقك مش كاملة ترجع من نفس طريقك علشان لا تضايق السرا !!!
اعطيته أوراقي وبطاقة الاعاقة وقام مشكور بتوجيهي لآخر شباك عند ” فلان ”
بس هي اربع خطوات مشيتها شوي ,, كل اللي في الصالة بصوت واحد ,, ليش تتقدم علينا في السرا ؟؟؟
جاني نفس العسكري ,, قال ايش فيك سويت لنا بلبله ؟؟؟!!!!
ها !!! بلبله !!! مش انت قلت روح لشباك ؟! ,, قال ارجع في السرا الله يصلحك .
أعطيته البطاقة ” الاعاقة ” وقلت ترى فيها مرسوم ملكي ,, برضوه ما خلصت كلامي ,, العسكري يقول لي قول لي كذا من أول ,, تفضل .
هنا ,, بس عشر دقائق أو أقل ,, وانا مخلص واوراقي معاي ورايح بيتي .
المعاناة حتى تصل الشباك ,, بعد كذا ,, أمورك تمشي بسرعة خيالية وهذا جهد يشكروا عليه .
والله يعينك على الخروج من الصالة من فوق الكراسي .
عند الباب الخارجي للصالة ,, أثنين شباب شكلهم مرح
يقول واحد منهم ,, الحين تشوف لعبة الكراسي
فعلاً مافيش ارقام كلهم على الكراسي كل ما مشي واحد ينقز اللي بعده على الكرسي وكذا لين تصل لشباك .
خرجت بالسلامة ,, ومن كثر الزحمة ما وصلت بيتي الا متأخر .
تعبت كان يوم صعب وصيام ولله الحمد ,, نمت .
وقبل ما انام جالس أفكر ,, في الجوازات نظام رهيب وسريع ومتطور للغاية وعسكرهم متفاهمين جداً ,, ليش ما يكون هناك مقر جديد غير هذا ,, ويش سبب تمسكهم بالموقع نفسة من فترة مش قصيرة .


اقرأ أيضاً :